الرجل الذى باع برج ايفيل

سنة 1925 كان الكونت فيكتور لوستج اشهر نصاب فى التاريخ قاعد فى جناحه الفاخر فى فندق الكونكورد فى #باريس و كان بيقرأ الجرايد و لقى مقال بيتكلم عن الحاجة الماسة لصيانة برج ايفيل لان حالته بقت بتمثل خطورة على ارواح المواطنين 
فيكتور لاستيج شاف المقال و بدأ يتحرك على طول و بعت جوابات حكومية مختومة بالاختام الحكومية و طلب اكبر خمس تجار خردة فى #فرنسا لاجتماع سرى جدا فى قاعة اجتماعات فى فندق دى كريون اللى كان معروف ان السياسيين و الدبلوماسيين بيعملوا اجتماعاتهم المهمة فيه
لما وصل تجار الخردة الخمسة دخلوهم قاعة الاجتماعات و بعد كده دخل ليهم فيكتور لوستيج و عرفهم على نفسه انه نائب مدير عام وزارة البريد و التلغراف و الاتصالات و قالهم انهم قرروا يفككوا برج ايفل بسبب حالته السيئة و قرروا بيعه خردة و اتكلم معاهم فى كل الامور الفنية 
بعد كده خدهم فى 3 عربيات حكومية و لفوا حوالين برج ايفيل و نزلوا شافوه فى حراسة الشرطة فالتجار اقتنعوا تماما 
اثناء الجولة اللى فى برج ايفيل بدأ فيكتور لوستيج يتابع التجار عشان يشوف مين اكتر واحد فيهم متحمس للموضوع و طلب من التجار تسليم عروض اسعارهم بسرية تامة لان الموضوع يتعلق بالامن القومى لفرنسا 
شاف لوستيج ان اكتر واحد فى التجار كان مهتم هو اندرى بويسن لكن اندرى بويسن مراته كانت قالتله ازاى عملية زى دى هاتبقى سرية شكله نصاب الراجل ده لكن لوستيج اتصل باندرى بويسن و طلب لقائه سرا فى نفس قاعة الاجتماعات فى فندق دى كريون
لما راح اندرى بويسن قابل فيكتور لوستيج لقى لوستيج بيكلمه عن مرتبه الضعيف و انه محتاج فلوس و يقدر يقدم حاجات كتير مهمة ففهم بويسن ان لوستيج موظف مرتشى عايز رشوة فتأكد بويسن انلوستيج موظف حكومى فعلا لان الموظفين الفاسدين كانوا كتير جدا فى الوقت ده
اندرى بويسن دفع لفيكتور لوستيج رشوة كبيرة و دفع كمان تمن شراء برج ايفيل كخردة و اتفقوا انه يبدأ يفكك البرج من بكرة
تانى يوم راح اندرى بويسن و معاه رجالته عشان يفك برج ايفيل و بدأوا يطلعوا البرج و معاهم عدتهم الشرطة قبضت عليهم و لكن اندرى بويسن ماقدرش يعترف على لوستيج وقتها عشان خاف من الفضايح 
و الموضوع ما اتعرفش الا بعدها بحوالى سنة و نص لما رجع فيكتور لوستيج تانى و حاول يعمل نفس العملية بس الموضوع اتكشف و هرب فيكتور لوستيجو مادخلش فرنسا تانى من ساعتها
#اعرف
#الناظر
------------------
الصور فى التعليقات
------------------------
المصادر :
1 - الرجل الذى باع برج ايفيل - فلويد ميلر
2 - أروع عمليات الاحتيال فى التاريخ - ألبين ميشيل
3 - المحتالون الاسطوريون - يونج اريك

ما اعرفتش اتخيل اندرى بويسن و هو رايح يفك برج ايفيل الا بالشكل ده 😂😂😂😂😂

الكونت فيكتور لوستيج أشهر نصاب فى التاريخ

 أندرى بويسن تاجر الخردة

فندق الكونكورد اللى كان مقيم فيه الكونت فيكتور لوستيج

فندق دى كريون اللى اتعملت فيه الاجتماعات
و الفندق ده كان مشهور بانه بتتعمل فيه اجتماعات السياسين و الدبلوماسيين و كبار رجال الدولة