مباراة القرن فى الشطرنج - بوبى فيشر ضد بوريس سباسكى

فى يوليو سنة 1972 الاتحاد الدولى للشطرنج عمل بطولة فى مدينة #ريكيافيك عاصمة #آيسلندا بين بطل العالم الروسى بوريس سباسكى و بين الامريكى بوبى فيشر اسطورة الشطرنج الصاعد فى الوقت ده و البطولة دى اعتبروها مثال للحرب الباردة بين #أمريكا و #روسيا فكان الاهتمام الدولى بيها كبير جدا
البطولة كانت 19 مباراة بين اللاعبين بس على امتداد 3 شهور و كان بوريس سباسكى معروف عنه ان بارع فى التنبؤ بحركات خصمه و استخدامها ضده اما بوبى فيشر فكان معروف عنه انه لا يستسلم ابدا و عنده مخرج لكل لعبة
بوبى فيشر كان عارف ان بوريس سباسكى لاعب قوى جدا فبدأ يلاعبه نفسيا قبل الماتش فعمل بوبى فيشر مشاكل على قيمة الجايزة و الترويج للبطولة و الكراسى اللى هايقعدوا عليها و اماكن التصوير و اماكن جلوس الجمهور و كل شوية يهدد بالانسحاب و كان بوريس سباسكى صبور جدا لاقصى درجة
و فى اول مباراة فى البطولة وصل بوبى فيشر قبل دقيقة واحدة من إلغاء المباراة و بدأت اول مباراة الساعة 5 و تسع دقايق و فى المباراة دى بوبى فيشر كان بيلعب لعب غبى جدا و اتغلب على طول و كانت دايما المباراة الاولى بتحدد مين اللى هايكسب البطولة
فى المباراة التانية راح بوبى فيشر فى ميعاده و لكن فضل يعترض على اماكن التصوير و طلب نقل مكان اللعب لمكان تانى و رفض يلعب لحد ما اللجنة المنظمة لغت المباراة و اعتبرته مهزوم و بكده اتهزم فى اول مبارتين فى البطولة و ده يعتبر اقرب ما يكون لخسارة البطولة دى
فى المباراة التالتة كان بوريس سباسكى واثق ان البطولة دى بقت بتاعته و ان بوبى فيشر خايف منه و فى ميعاد المباراة وصل بوبى فيشر فى ميعاده و كان هادى و واثق من نفسه جدا و مبتسم و بدأت المباراة و فاز بيها بوبى فيشر فى اقل من عشر دقايق و قام و بص لجمهوره و كان بيضرب ايده فى بعض و قالهم انا بسحقه بقوة
و بعد كده فاز بوبى فيشر المباراة الرابعة و الخامسة و السادسة و بعد المباراة السادسة بكى بوريس سباسكى بكاء شديد و مسئولى الاتحاد الروسى طلبوا منه الانسحاب و العودة لروسيا لكن سباسكى رفض
بعد كده فاز بوبى فيشر المبارة السابعة و الثامنة و بعد المباراة الثامنة بوريس سباسكى قال للصحفيين ان بوبى فيشر بينيمه تنويم مغناطيسى و بعد المباراة التساعة قالهم ان عصير البرتقال اللى شربوه اثناء المباراة كان فيه مادة كيميائية بتأثر على تفكيره
و بعد المباراة الـ11 قال ان فيه مادة بتضخ فى الهواء بتأثر على تركيزه و جت لجنة من المخابرات الروسية KGB حللت الهواء و راقبت المكان
و بعد المباراة الـ14 قال اان الكراسى فيها حاجة بتأثر عليها ففكوا الكراسى و صوروها بآشعة اكس علشان يشوفوا ايه اللى موجود و طبعا كل مرة يحللوا مايلاقوش حاجة لدرجة ان ممثل الكيه جى بى فى البطولة قال ان تصرفات بوريس سباسكى بتحرج روسيا
و بعد المباراة الـ18 اشتكى من انه بيعانى من هلاوس و عملوا مسح للمكان كله و مالقوش غير دبانتين واقفين على الكشاف اللى فى جهة سباسكى فاعتبروا ان ده السبب فى الحالة الغريبة دى
و فى اخر مباراة يوم 2 سبتمبر اتعادلوا و حصل بوبى فيشر على لقب بطل العالم فى الشطرنج الحادى عشر و لكن بوريس سباسكى اختفى تمام و ما ظهرش مرة تانية الا فى سنة 1992 لما عمل مباراة تحدى مع بوبى فيشر فى #يوغسلافيا اتحرم بوبى فيشر بسببها من الجنسية الامريكية و كان مطلوب القبض عليه لانه لعب مباراة فى يوغسلافيا و كسر الحصار اللى كان عليها
#اعرف
#الناظر
------------------
الصور فى التعليقات
------------------------
المصادر :
1 - فيشر ضد سباسكى - مباراة القرن فى الشطرنج - سيتوزار جليجوريتش
2 - نهاية اللعبة - صعود و سقوط بوبى فيشر - فرانك برادى
3 - بوبى فيشر يذهب الى الحرب - كيف خسر السوفييت اكثر مباراة شطرنج استثنائية - جون ايدينو

بوبى فيشر فى طريقه للبطولة

بوبى فيشر فى البطولة

بوبى فيشر و بوريس سباسكى فى المباراة الاولى التى خسر فيها بوبى فيشر

بوريس سباسكى يصافح بوبى فيشر فى المباراة الرابعة و هى ثانى مباراة فاز بها بوبى فيشر

بوريس سباسكى و بوبى فيشر فى بداية المباراة الثالثة و كان واضح على سباسكى ثقته الشديدة بنفسه الا ان بوبى فيشر فاز بالمباراة فى 10 دقائق

بوبى فيشر و بوريس سباسكى فى المباراة اللى اقيمت فى يوغسلافيا سنة 1992 و تسببت فى وضع بوبى فيشر على قوائم المطلوبين و حرمانه من الباسبور الامريكى

بوبى فيشر و بوريس سباسكى

بوريس سباسكى فى البطولة

بوريس سباسكى فى المباراة الاولى منتظرا بوبى فيشر

سباسكى يغادر قاعة اللعب بعد هزيمته فى المباراة السابعة و شكه فى ان فيشر ينومه مغناطيسيا